The beginning

In which language you want to read story comment. ............................................................

Mahal ke deewar-o-dar aaj khamosh the, par ye khamoshi sukoon wali nahi thi. Is khamoshi mein cheekhein thi-un mata-pita ki jinki saansein thami thi, aur us Rajkumari ki jiska wajood hi mita diya gaya tha.

"Rajkumari Rajsree mar chuki hai."

Jab uske chacha ne ye elaan kiya, toh baahar khadi bheed ro rahi thi, par mahal ke andar shatranj ki baazi palat chuki thi.

Sree, jo kal tak us takht ki kismat thi, aaj ek saaye ki tarah apne hi mahal ki deewaron se takra rahi thi.

Jis Rajkumari ko talwar chalana, rajneeti samajhna aur dushman ko dhool chatana sikhaya gaya tha, aaj wahi Rajkumari apne hi ghar se bhagne par majboor thi.

Uske apno ne hi use ek shikar samajh liya tha.

(Sree ki aankhon mein ek aag thii)

Sree ne apne ghoonghat ke peeche se us kursi ko dekha jahan kal tak uske pita baithte the. Unki seekh uske kaanon mein goonj rahi thi- "Beta, darr dushman ka hona chahiye, tera nahi." Usne apne aansuon ko poncha nahi, balki unhe sookhne diya. Aaj Rajkumari Sree mar gayi thi,

par isi raakh se ek naya 'Rahasya' janm lene wala tha. Use Manveer ke paas jaana tha... par ek patni bankar nahi, balki ek aisi paheli bankar jise suljhate-suljhate Manveer apni duniya bhool jaye.

Baahar toofan ne dastak de di thi, shayad kudrat bhi us gunehgaar shatranj ke khilaf gawahi de rahi thi. Sree ne apne badan par pehne bhari shahi gehne ek-ek karke utaar diye.

Wo sone ke kangan aur motiyon ke haar, jo kabhi uski shaan the, aaj use bediyon jaise lag rahe the.

Usne ek purana, mailla sa dhushala (chadar) uthaya aur khud ko usmein samet liya. Usne wahi talwar uthayi jo uske pita ne use uske pandrahvein janamdin par di thi-ek aakhri nishani, ek aakhri sahara.

"Piche mudkar mat dekhna, Sree..." usne khud se kaha.

Jab wo mahal ke pichle darwaze par pahunchi, toh usne ek aakhri baar us oonche parcham (flag) ki taraf dekha jo ab dhundla dikh raha tha.

Usne mitti uthayi aur apne maathe par lagayi. "Aaj Rajkumari Rajsree is mitti ko chhor kar ja rahi hai... par wada hai mera, ek din 'Sree' wapas aayegi, aur tab takht par khoon nahi, insaaf ka rang hoga."

Wo andhere jungalon ki taraf bhaag nikli. Piche mahal ke andar uski maut ka jhootha jashn manaya ja raha tha, aur aage ek anjaan duniya thi, jahan use apni pehchaan chhupakar, ek 'ansuljha raaz' bankar rehna tha.

Sree ke paon ab uska saath chhor rahe the. Mahal ki makhmali raahon par chalne wali Rajkumari aaj pathreeli zameen par girte-sambhalte, maut ke darr se nahi, balki zindagi ki talash mein bhaag rahi thi. Door ek chhota sa gaon dikha. Gaon ki sarhad (boundary) par ek tuti-phuti jhopri thi, jahan se dhuaan nikal raha tha.

Sree ladkhadaate huye us jhopri ke baahar pahunchi. Uska gala sookh kar kaanta ho chuka tha.

"Paani..." Sree ki awaaz thartharayee. "Maayi, thoda paani..."

Jhopri ke andar se ek phate-purane libaas mein lipti ek aurat baahar aayi. Usne Sree ki halat dekhi-fate kapde, lekin un par bani shahi kadhai aur Sree ke chehre ka tejas bata raha tha ki wo kisi bade ghar ki beti hai. Par us aurat ne paani ka lohta aage badhane ke bajaye wahi ruk kar Sree ko gaur se dekha.

"Kaun jaat ho, lali?" us aurat ne thande sur mein pucha.

Sree ne hairani se apni aankhein uthayi. Maut peeche padi thi aur ye aurat pyaas ke beech jaat puch rahi thi?

"Main... main bas ek musafir hoon maayi. Gala sookh raha hai, bas do boond paani de do," Sree ne gidgidaye huye kaha.

Aurat ne ek gehri saans li aur kadwi sachai bayaan ki- "Hum 'Shudra' hain lali. Hamara chhuwa paani tere liye amrit nahi, zeher ban jayega. Agar tu unchi jaat ki hai aur mera diya paani piya, toh tu 'ashuddh' ho jayegi. Main teri pyaas bujhane ke jurm mein tere dharam ka bojh nahi utha sakti."

Sree sunn reh gayi. Usne mahal mein rajneeti padhi thi, dushman se ladna seekha tha, par ye 'insaniyat ke batwaare' ka rahasya aaj pehli baar uske samne aaya tha. Usne us aurat ke chehre ki jhurriyon mein wo dukh dekha jo shayad uske khud ke dukh se purana tha.

Sree ne apna kapata hua hath aage badhaya aur kaha, "Maayi, maut ko peeche dekh kar aa rahi hoon... wahan na koi jaat hai, na koi dharam. Pyaas ko sirf paani chahiye,. Ise pilakar mujhe ashuddh kar de, par marne mat de."

Aurat ne kapte haton se mitti ka lohta Sree ki taraf badhaya, par uski aankhon mein darr abhi bhi tha.

"Pee le lali... par yaad rakhna, maine tujhe jata diya tha. Kal ko tere dharam wale tujhe thukrayein ya mere hath ka pani peene se tere saath kuch bura ho, toh is abhagan ko dosh mat dena. Hum toh paida hi gunaahgar huye hain," aurat ne dukh se kaha.

Sree ne bina kuch soche paani piya. Wo sheetal jal uske gale se niche utra, par us aurat ki baaton ne uske dimaag mein ek toofan khada kar diya tha. Paani peekar usne gehri saans li aur us kutiya ki taraf dekha jo garibi aur gham ki pehchan thi.

"Maayi... mere rajya mein toh aisa kabhi nahi hota tha. Ye kaunsa rajya hai jahan pyaas bujhane se pehle jaat puchi jati hai?" Sree ne hairat se pucha.

Aurat ne ek sard aah bhari, "Ye Sultangarh hai lali. Abhi kuch waqt pehle hi ek Hindu Raja ne ise Musalmanon se jeeta hai. Wo Raja... wo bada pakhandi hai! Dharam ke naam par usne hum jaise gareebon ka jeena dushwar kar diya hai. Uske lalach ki wajah se mere pati aur jawan beta, dono yuddh mein maare gaye." Uski aankhon se ek aansu gira jo uski jhurriyon mein kho gaya.

"Zulm toh dekh, hum Shudra hain toh unka kriya-karam tak karne ki ijaazat nahi hai humein. Ab bas bhagwan se minnat karti hoon ki unki bhatakti aatmaon ko shanti mil jaye. Hum toh zinda rehkar bhi mare huye ke barabar hain."

Sree ka khoon khoul utha. Usne hamesha praja ki raksha ka sapna dekha tha, aur yahan praja dharam ke naam par kuchli ja rahi thi. "Maayi, ye toh bahut galat hai! Raja ka dharam toh sabki raksha karna hota hai."

"Pata nahi lali... hamare saath toh hamesha se aisa hi hota aaya hai. Jahan bhi jao, koi izzat nahi milti. Par tu... tu itne shahi kapdon mein is haal mein kaha se aayi hai? Kaun jaat hai teri?" Aurat ne use gaur se dekhte huye pucha.

Sree ne ek pal ke liye mahal ki un yaadon ko dafan kiya. Usne mandir ki chaukhat ki taraf dekha aur dhime se kaha- "Maayi, main anath hoon. Is duniya mein ab mera koi thikana nahi. Bas bhatak rahi hoon... ek aisi jagah ki talash mein jahan insaan ko sirf insaan samjha jaye."

Raat gehra chuki thi. Jangal ki hawayein kisi purane zakhm ki tarah sarsara rahi thi.

Budhi aurat ne Sree ka hath thama aur narmi se kaha, "Itni kaali raat mein kahan bhatkegi lali? Baahar darinde aur usse bhi bure insaan ghoom rahe hain. Aaj ki raat meri is chhoti si kutiya mein guzaar le."

Sree ne us tooti hui chhat ki taraf dekha jahan se tare saaf nazar aa rahe the. Usne sar hilaya aur maan gayi. Us raat, mitti ki zameen par ek Rajkumari aur ek abhagan maa saath soyi thi. Dono ke dukh alag the, par dono ki raatein ek jaisi lambi thi.

Suraj ki pehli kiran ke saath Sree ne us budhi aurat se vida li. Usne us aurat ke paon chhuye, jo shayad us aurat ki zindagi ka sabse bada samman tha.

Sree ka rasta ab Guru ji ke Aasram ki taraf tha-wahi jagah jahan usne bachpan mein shastra aur shastron ki seekh li thi. Jab wo dhool se lathpath aur thaki-haari aasram pahunchi, toh Guru ji ne use pehchante hi gale se laga liya.

Guru ji ne Sree ke sar par hath rakha aur dheere se kaha, "Sree, yahan ka sukoon tere zakhmon ko bhar dega beti. Tu yahan mehfooz hai."

Sree ne turant Guru ji ka hath thama aur unki aankhon mein dekhte huye kaha, unki awaaz mein ek aisi thandak thi jo barf ki tarah chubhti thi:

"Acharya... main yahan sukoon ki talash mein nahi aayi hoon. Main yahan sirf isliye aayi hoon taaki main un darindo se badla le saku jinki wajah se mera sabkuch mujhse chheen liya gaya."

Usne apni mutthi bheenchi, itni zor se ki uske nakhun uski hatheli mein gadne lage.

Guru ji ne ek gehri saans li. Unhone Sree ki aankhon mein wo masoomiyat ab kahin nahi dekhi, wahan sirf ek sulagta hua jwaalamukhi tha. Unhone samajh liya tha ki ab ye Rajkumari rukne wali nahi hai.

"Theek hai Sree," Guru ji ne gambhir hokar kaha. "Agar tu ne badle ka raasta chun hi liya hai, toh yaad rakhna-ye raasta tujhe bhi andar se jalayega. Par agar teri niyat saaf hai, toh meri har vidya, mera har vardan tere saath hai."

✿⁠ ⁠♡♡ ✿⁠ ⁠♡♡ ✿⁠ ⁠♡♡ ✿⁠ ⁠♡♡

(⁠◍⁠•⁠ᴗ⁠•⁠◍⁠)⁠❤ my lovely readers aaj mera birthday hai.

Aaj maine ye first chapter the beginning aapke liye likha hai kaisa laga jauar batana.

And agle chapter se character pov main story likhi jayegi ye starting main bas base banane ke liye likha gaya hai.

Jo log story likhna cahte hai par unique tarike nahi jante ki kaise readers ko attract karke likhna hai vo comment kare main unhe sikha sakti hu.

Show your love for this story.😘

😘❤️.